LES VIDERE ETTER ANNONSEN
FÅ NYHETER PÅ MOBILEN
Last ned Khrono-appen!
ntnu
Instituttet vart delt. No er trivselen kartlagd
Forskarane som fekk skulda for ein del av konfliktane i historiemiljøet ved NTNU, rapporterer no om betre arbeidsmiljø enn kollegaene som vart igjen.
Publisert
Sist oppdatert
Etter år med konfliktar toppa det seg sommaren 2018: Professor Kristian Steinnes vart flytta vekk frå Institutt for historiske studier ved NTNU - mot sin vilje. På seinhausten 2019 vart instituttet delt i to: Institutt for historiske og klassiske studier (IHK) og Institutt for moderne samfunnshistorie (IMS). Heller ikkje namnevalet på dei to nye institutta skjedde utan konflikt.
Kjernen i det nye Institutt for moderne samfunnshistorie var forskargruppa Fate of Nations. Denne gruppa var mykje omtala i konflikten, og NTNU-leiinga sa på eit tidspunkt at denne gruppa hadde det objektivt sett største ansvaret for konflikten.
Når arbeidsmiljøet ved NTNU no er kartlagt, gjennom ei såkalla ARK-undersøking, er det IMS som skårar best av dei to historiske institutta.
Det er Universitetsavisa som skriv om saka først.
Skilnad i opplevd konfliktnivå
I snitt skårar IHK 0,44 poeng lågare enn naboinstituttet. Skilnadane viser seg særleg når dei tilsette er spurde om «kultur for utvikling», «fravær av personkonflikt», «fellesskap mellom kolleger» og «respektfull omgangstone».
Ser ein på «fravær av mistroiskhet og mistenksomhet» er skilnaden på 1,3 – 5 for IMS og 3,7 for IHK, skriv Universitetsavisa.
Instituttleiar Karl Erik Haug kom til IMS frå Luftkrigskolen. Han seier til Universitetsavisa at tala var som han hadde håpa og forventa. Dette er første gongen dei to institutta er med på ARK-undersøkinga, i 2019 meinte NTNU-leiinga at det måtte gå seg til på dei nye institutta før dei skulle svara på undersøkinga.
— Det har vore lagt ned mykje arbeid med arbeidsmiljøet ved instituttet. Me har jobba systematisk med å gjera den kollektive kulturen sterkare, ikkje berre reint arbeidsmiljømessig, men òg med tanke på undervisning og forsking, seier Haug til Universitetsavisa.
Han seier at han merkar seg at nye medarbeidarar som har kome til er like nøgde som dei som vart med over då det nye instituttet vart oppretta.
Gler seg over svarprosent
Jan Frode Hatlen er leiar ved naboinstituttet. Han seier til UA at han gler seg over god svarprosent. Den var 73 prosent for IHK og 80 prosent for IMS.
— Det er mykje positivt å lesa i spørjeundersøkinga for IHK, men det er dei tilsette som skal få definera kva dei meiner er gode resultat, og korleis dei skal tolkast. No skal me diskutera dette på eit personalseminar med alle tilsette, og i fellesskap finna bevarande og utviklande tiltak for arbeidsmiljøet.
