Forskerforbundet reagerer på krisehandteringa ved NTNU

Det herskar stor uro ved Institutt for historiske studier (IHS) ved NTNU om dagen. Fleire ser med spenning mot styremøtet den 31. oktober. Der skal forslaget til konstituert rektor, Anne Borg, om å skille ut forskargruppa «Fate of Nations» behandlast. I tillegg skal styret vedta om enkeltpersonar skal påleggast ordensstraff eller andre reaksjonar i kjølvatnet av dei mangeårige konfliktene ved instituttet.

Midt i det heile står Forskarforbundet, som representerer folk i alle endar av konflikta.

Gry Eva Sinkaberg Alterskjær er hovudtillitsvalt for Forskarforbundet ved NTNU og seier dei no er inne i ein uvanleg omfattande situasjon. Ho opplyser at det er totalt seks tillitsvalde både lokalt og sentralt frå Forskarforbundet som er og har vore inne i saka kring Institutt for historiske studier.

Alterskjær har fleire tankar om korleis konflikta ved instituttet har blitt handtert.

Ho meiner det i denne konflikta er menneske som rett og slett ikkje vil kunne samarbeide godt på lang tid. Likevel har ho denne kommentaren til forslaget til oppsplitting:

— Dette er eit krevjande tiltak å setje i verk og det håper og reknar eg med leiinga er klar over. Det må ligge veldig gode grunnar bak for å anbefale dette. Men det er ein veldig uvanleg situasjon, så kanskje er det eit slikt tiltak ein kan få til i ei slik sak, seier Alterskjær til Khrono. Ho legg til:

— Likevel er det å skilje folk ikkje nok, ein må jobbe aktivt for å restituere eit godt arbeidsmiljø på tvers av desse miljøa. Det forventar eg at leiinga har klart føre seg. Uansett kva slags tiltak ein vel å gjere, vil det vere eit av ei rekke tiltak. Dette vil ta lang tid og Forskerforbundet vil følgje nøye med, seier Alterskjær til Khrono.

— Går for seint inn i konflikta

I møte med denne konflikta, har fleire av diskusjonane internt i Forskarforbundet dreia seg om kvifor ein ikkje har valt å gå inn i i konflikta tidlegare og seinare kva slags grep ein faktisk har valt å ta, fortel Alterskjær.

— Konflikta får bygge seg opp over veldig lang tid, før ein vel å gå inn. Så set ein i verk tiltak i beste meining, men har kanskje ikkje teke inn over seg korleis situasjonen no er og endar med å ta grep som kanskje ikkje er dei mest hensiktsmessige. Ein bør aldri kome i den situasjonen ein no er inne i, seier Alterskjær og legg til:

— Vi har ei sterk forventning om at leiinga går i seg sjølve og gjer ei skikkeleg evaluering av korleis dei går inn i konfliktar.

• Les også: Hvordan reparere et ødelagt arbeidsmiljø?

— Uheldig med plassering av skuld

Alterskjær reagerer også på det som for fleire kan oppfattast som plassering av skuld i denne saka.

Les også:

NTNU-professor Frøland: «Jeg har god samvittighet, og har ikke gjort annet galt enn å kritisere ledelsen».

— Det er uheldig når ein byrjar å plassere skuld, fordi det gjer det vanskeleg å få folk til å sjå framover. Det er ein lite produktiv måte å handtere ei konflikt på. Fokus bør vere på å bygge eit forsvarleg arbeidsmiljø for alle og legge til rette for at alle kan starte med blanke ark, seier Alterskjær.

I sommar offentleggjorde NTNU ein rapport frå ei faktakartlegging om arbeidsmiljøkonfliktene ved Institutt for historiske studier (IHS).

Faktagranskarane delte instituttet inn i to grupper som står mot kvarandre (kalla Gruppe 1 - dei som er kritiske til leiinga og Gruppe 2 - dei som støttar institutt- og fakultetsleiinga). Dei to gruppene består av til saman 26 personar, medan litt over 80 personar er knytt til instituttet.

Alterskjær meiner denne faktaundersøkinga kan ha bidrege til å gjere konfliktene enno meir tilspissa.

— Ein bør diskutere nøye korleis ein vel å bruke slike faktaundersøkingar. Den har ein del sider ved seg som definitivt ikkje er heldige. Det vi ofte registrerer er at dei polariserer den konflikta som allereie er der. Folk føler seg tvungne til å ta side i saka og føler seg pressa til å seie noko, seier Alterskjær og legg til:

— Ein må sjølvsagt kartlegge, men ein treng ikkje gå inn på ein så omfattande måte.

Dei tilsette ved IHS har no blitt inviterte til å kome med sine tilbakemeldingar til forslaget frå konstituert rektor Anne Borg om oppsplitting. Dei har frist måndag 7.oktober til å melde frå.

Deretter vil sentralt samarbeidsutvalg (SESAM) samlast den 16. oktober. Her kan fagforeiningane basert på saksnotatene til NTNU styret og tilbakemeldingane frå dei tilsette, kome med sine innspel til korleis leiinga bør handtere konflikta, før det endelege forslaget til vedtak går til styret den 31. oktober.

Sanksjonar mot tilsette opp til styret

På styremøtet skal også dei alvorlegaste reaksjonane mot einskildpersonar vedtakast. HR-sjef Arne Hestnes har tidlegare stadfesta at det kan vere snakk om ordensstraff, suspensjon, oppseiing eller avskjed. Mildare sanksjonar, som åtvaring og irettesetting, er det rektor som skal avgjere.

Så langt Khrono kjenner til har ingen enno fått melding om dette.

Kva tenker de i Forskarforbundet om dette?

Les også:

Flere ansatte kan vente seg reaksjoner etter hendelser ved konfliktrammet institutt på NTNU

— Det finst grenser for korleis tilsette kan opptre i sitt arbeidsforhold. Men vi veit framleis lite om kva som er grunnlaget for at leiinga vurderer sanksjonar for enkelte. Dersom nokon av våre medlemmar får sanksjonar retta mot seg, så vil vi vurdere grunnlaget for sanksjonen dersom medlemmet ber oss om bistand til dette, seier Alterskjær.

Vil ikkje kommentere Steinnes-saka

Tidlegare leiar i Forskerforbundet ved NTNU, Kristian Steinnes, er ein av dei som allereie har fått reaksjonar og blitt omplassert til eit anna institutt mot si vilje for over eit år sidan. Han har enno ikkje fått noko signal om, eller kva slags plass, ha vil få i ei eventuell ny organisering av instituttet.

— Kva tenkjer Forskerforbundet om Steinnes-saka no?

— Eg ønskjer ikkje å svare på spørsmål som gjeld enkeltmedlemmar ettersom fokuset vårt er på heile arbeidsmiljøet, og alle skal takast vare på og få eit forsvarleg arbeidsmiljø. Den enkelte blir følgt opp med bistand ved førespurnad og etter dei retningslinjer Forskerforbundet har, sier hovudtillitsvald på NTNU, Gry Eva Sinkaberg Alterskjær. Forskerforbundet sentralt ønsker ikkje å kommentere saka.

• Les også: Forskerforbundet ved NTNU reagerer på innblanding fra Forskerforbundet ved UiB