Sender Rotevatn-klage til departementet

I byrjinga av august valte leiinga ved Høgskulen i Volda å gjera ei såkalla mellombels omplasering av Audhild Gregoriusdotter Rotevatn. Bakgrunnen er ei arbeidsmiljøsak ved Avdeling for mediefag, der Rotevatn er dekan. Rotevatn klaga på avgjerdsla.

No er saka på veg til Kunnskapsdepartementet for andre gong, etter at styret ved høgskulen handsama henne for andre gong denne veka.

— Styret stadfesta vedtaket frå førre møte. Klagen vert no sendt vidare til Kunnskapsdepartementet.

Det skriv rektor Johann Roppen i ein sms til Khrono.

Fekk støtte frå departementet

Rotevatn klaga først til departementet etter at høgskulestyret ikkje fekk saka til handsaming. Ho fekk støtte i at saka skulle opp i styret, og ho skulle få koma til orde. Dette skjedde då styret hadde møte i Fosnavåg i oktober. Der fatta styret vedtok om at dei ikkje ville realitetshandsama saka fordi det ikkje var fatta noko enkeltvedtak ein kunne klaga på.

Tilrådinga frå leiinga før desember-møtet var det styret vedtok: Å stadfesta vedtaket frå førre møte.

Det betyr at det er Kunnskapsdepartementet, som er leia av forskings- og høgare utdanningsminister Iselin Nybø, som får saka på sitt bord. Nybø kommenterte saka så vidt då ho var i Volda i samband med studiestart.

— Konflikta må løysast lokalt, sa Nybø då.

Har brukt nesten fire månader

Geir Waage Aurdal i fagforeininga Samfunnsviterne er Rotevatn sin rådgivar i denne saka.

— At klaga no går til departementet er som forventa, svarar Aurdal kort på sms i etterkant av styremøtet.

Då Khrono snakka med han før styremøtet sa han at tidsbruken til høgskulen i denne saka er oppsiktsvekkjande. Han viste til at styret har nytta Skype-møte i andre samanhengar, og at dei no har brukt nesten fire månader på å handsama klagen.

Det er Odd Ragnar Hunnes som no er konstituert som dekan ved Avdeling for mediefag.

1. februar går halvåret med mellombels omplassering ut. Rektor Roppen ville ikkje seia noko til Khrono om kva som er planen frå denne datoen.