Direktøren sin sluttavtale: Tre år på heimekontor og 450.000 kroner

Ann-Kristin Emblem, tidlegare høgskuledirektør ved Høgskulen i Volda (HVO), sa formelt opp stillinga si som direktør 13. mars.

— Usemje med styret, sa Silje Louise Dahl, som har vore fungerande styreleiar i saka, til Khrono då det vart kjent at Emblem har sagt opp.

Khrono har fått innsyn i sluttavtalen til Emblem. Der kjem det fram at den tidlegare direktøren får med seg direktørløna i prosjektstillinga ho skal ha dei neste tre åra. 

Løna hennar er no knappe 1,3 millionar kroner i året. I tillegg får ho 450.000 kroner når ho sluttar arbeidsforholdet ved Høgskulen i Volda i 2028.

Den tidlegare direktøren kan velja å slutta i stillinga si tidlegare. Då vil ho likevel få med seg dei 450.000 kronene.

Høgskulen i Volda

Rektor og direktør krangla i styre­møte: — Oppteken av å visa at rektor har gjort feil

Prosjektleiar under direktøren

Emblem skal over i ei ny stilling med stillingstittel prosjektleiar og skal jobba med oppgåver knytt til forsking innanfor forvaltningsrett.

I avtalen heiter det at ho skal jobba med ei prosjektskisse som skal vera ferdig innan 31. januar 2026. I tillegg kan prosjektstillinga få i oppdrag å jobba med særskilde administrative utgreiingsoppdrag.

Fram til siste arbeidsdag, som er utgangen av april 2028, skal Emblem sitja på heimekontor, heiter det i avtalen.

Det er høgskuledirektøren som får personansvar for Emblem, men fram til ny  direktør er på plass, er det styremedlemmane Roar Tobro og Kjersti Kleven som skal forvalta dette ansvaret på vegner av styret.

Prorektor Eirik Søvik sa til Khrono etter at oppseiinga var kjent sist veke, at det så langt ikkje er konstituert nokon ny høgskuledirektør.

I sluttavtalen heiter det vidare at det er ein dekan som vil få det faglege ansvaret for prosjektstillinga.

Høgskulen i Volda

Fagforeining seier nei til forhandling med oppsagd direktør

Vil ikkje kommentera

Dahl har vore fungerande styreleiar i saka fordi rektor Odd Helge Mjellem Tonheim har vore inhabil. Forholdet mellom Tonheim og Emblem har vore konfliktfylt heilt sidan Tonheim vart rektor hausten 2023, og dei to har mellom anna varsla mot kvarandre.

— Eg kan verken kommentera innhald eller prosess knytt til denne avtalen, seier Dahl til Khrono.

Khrono har vore i kontakt med Emblem sin advokat i Juristforbundet. 

«Denne side var kjent med at sluttavtalen trolig ville bli omtalt i media, som det også fremgår av dens punkt 8.2. Det er imidlertid ikke ønskelig å gi noen kommentarer til saken. Medieomtalen har vært en stor påkjenning. Nå er det et felles ønske fra alle involverte at det blir mer ro rundt situasjonen fremover», skriv advokat Andreas Holmsen-Ringstad i ein e-post.

I punkt 8.2 heiter det at «Partene er enige om å behandle Avtalen og innholdet konfidensielt. Denne konfidensialitetsforpliktelsen er ikke til hinder for at Partene kan gi opplysninger om innholdet i Avtalen til offentlige myndigheter og i lovpålagte tilfeller. Partene er kjent med at det vil kunne bli krevd — og gitt — innsyn i avtalen».

Oppseiinga vart oppheva

Også høgskulestyret og Emblem har hatt eit konfliktfylt forhold. Styret sa opp Emblem som direktør i april 2024, og har mellom anna vedteke at det ikkje har tillit til henne. Meir enn eit halvt år seinare, i november, oppheva Kunnskapsdepartementet oppseiinga. 

Emblem stod i stillinga i heile oppseiingstida, som i utgangspunktet var seks månader og som vart forlenga sidan departementet ikkje kom med nokon konklusjon i løpet av denne perioden. 

Ho har fleire gongar gjort det klart at ho ikkje ønskjer å snakka med Khrono, mellom anna då meldinga om at departementet omgjorde oppseiingsvedtaket kom.

Høgskulen i Volda

Høgskuleleiinga er kalla inn på teppet ein gong til

Akkurat innanfor grensa

Ein sluttpakke på 450.000 kroner er den grensa som er sett i tildelingsbreva som Kunnskapsdepartementet sender til universitet og høgskular. 

Som Khrono skreiv i 2024, er det dei siste åra inngått 69 sluttavtalar ved norske universitet og høgskular. Fleire av dei er ikkje i tråd med regelverket, mellom anna NTNU sin avtale med Øyvind Eikrem og Universitetet i Bergen sin avtale med den tidlegare fakultetsdirektøren Ørnulf Lillestøl.

Eigentleg skal departementet gi løyve til å inngå slike sluttavtalar, men fleire universitet og høgskular viste til ei fullmakt då Khrono spurde dei om avtalane. Då er det nettopp tildelingsbreva det vart vist til. Der heiter det at institusjonane kan «inngå forlik eller innrømme ansvar i saker om erstatning opp til 450.000 kroner».

Kunnskapsdepartementet skriv i ein e-post til Khrono at dei har vore kjent med at det har kome på plass ein avtale ved HVO, men at dei ikkje har vore med på å utforma avtalen.

Også ved Høgskulen i Volda er det inngått sluttavtalar som har vore omstridde. Khrono har skrive at både ein tidlegare studiedirektør og ein annan tilsett har fått avtalar der styret har vore i tvil om summen har vore innanfor grensa av dei 450.000.

— Eg har forståing for at ein av og til må inngå avtalar med tilsette, òg avtalar som kan kosta pengar, sa professor Per Halse i eit styremøte i haust.

Han sa òg at dei avtalane Emblem hadde inngått med desse to tilsette, var problematiske. 

Sak oppdatert 18.mars kl 8.45 med kommentar frå Silje Louise Dahl og kl 10.26 med opplysningar om Emblem si løn