Valkamp i Bergen: Skal møtast til duell fjorten gongar

Dei tre rektorlaga som stiller til val ved Universitetet i Oslo (UiO), skal møta kvarandre til debatt tretten gongar før tilsette og studentar skal gå til dei digitale valurnene. 

Veljarane ved Universitetet i Bergen (UiB) kan høyra dei to rektorkandidatane minst like mange gonger dersom dei ønskjer det: Det er lagt opp til fjorten duellar mellom Team Hagen og Team Øvreås.

Den første debatten er 21. februar.

Rektorvalg

Valgplatt­formene får stryk: — Dørgende kjedelig

Ein av kandidatane ville rundt

I valreglementet for UiB heiter det at «valgstyret gjennomfører et møte før valget der kandidatene blir presentert for universitetets ansatte og studenter».

Dette skjer 19. mars, og det blir den siste planlagde debatten før ein kan gå til dei digitale valurnene 24. mars.

Men før dette vert det mellom anna møte mellom dei to kandidatane ved dei sju fakulteta og ved universitetsmuseet.

— Det var den eine kandidaten som vende seg til oss. Dekanane har ikkje ei formell rolle i eit rektorval, men i reglementet heiter det at valstyret berre skal ha eitt møte. Så dei sju dekanane og museumsdirektøren samla seg og laga ei skisse, seier Karl Harald Søvig.

Han er dekan ved Det juridiske fakultetet.

Det er no lagt opp til fakultetsvise møte på dagtid. Først ut er Det psykologiske fakultetet, som har sitt arrangement 7. mars.

— Me har bede om ein presentasjon av dei to rektorlaga sine plattformer, med fokus på det aktuelle fakultetet. Så vert det lagt opp til spørsmål frå salen, seier Søvig.

rektorval

Vil ha fire nye år som rektor. — Eg kan Universitetet i Bergen

Ytringsfridom og demokrati

Søvig seier at det for dekanane er likebehandling og eit levande universitetsdemokrati som har vore viktig når dei har lagt opp til alle valdebattane. 

Det same var viktig for Khrono sin redaktør Tove Lie. Avisa var tidleg ute med å legga til rette for ein debatt ved UiB. Og då Khrono inviterte dei to rektorane så var det berre sett opp eitt valarrangement i Bergen. Khrono sin debatt vert arrangert 5. mars.

— Heldigvis sa begge kandidatane i Bergen ja til å vera med på debatt, og vi tar debatten på kafe etter arbeidstid og vonar på mingling med både kandidatar og elektorat i etterkant, seier Lie.

Ho seier at universitetsdemokrati og ytringsfridom er viktige saker for Khrono, og at avisa skriv mykje om problemstillingar rundt disse temaene. 

— Me vil få fram kva kandidatane tenkjer om dette, og mange andre tema. Eit rektorval ved eit av landets største universitet, er ikkje berre ei lokal sak, seier Lie.

— I tillegg til kva som skil kandidatane i valprogramma deira, vil me også prøva å verta kjent med menneska som ønsker å bera rektorkjede i fire år framover. 

Rektorval UiB

Dei vil ta over rektoratet ved Universitetet i Bergen. — Har breiare erfaring

Berekraft og studentar

I Bergen er den aller første rektordebatten ein del av forskingsdagen ved Institutt for pedagogikk. Deretter vert det ein debatt om berekraft, som Senter for klima og energiomstilling (CET), Senter for bærekraftig arealbruk (CeSAM) og UiB Bærekraftspilotene står bak. 

I løpet av ti dagar er det så åtte arrangement rundt på fakulteta og museet, før det vert eit eige valmøte for fellesadministrasjonen og eitt i regi av Studentparlamentet.

— Korleis skal kandidatane gjera UiB betre for studentane, er eitt av spørsmåla som kandidatane skal svara på der.

Debatten som valstyret arrangerer, vert den siste i rekka.

Her er heile lista:

• 21. februar 11-12: Debatt på forskingsdagen ved Institutt for pedagogikk, Dialogen, Christies gate 12
• 3. mars 08:30-10: Rektordebatt om bærekraft, Smauet Kafé NG5
• 5. mars 15/16: Khronos valdebatt
• 7. mars 10-11: Det psykologiske fakultet, Dialogen, Christies gate 12
• 7. mars 12-13: Fakultet for naturvitenskap og teknologi
• 10. mars 9-10: Det juridiske fakultet
• 11. mars 10-11: Fakultet for kunst, musikk og design
• 11. mars 14-15: Det humanistiske fakultet
• 14. mars 13-14: Det samfunnsvitenskapelige fakultet
• 17. mars 10-11: Det medisinske fakultet
• 17. mars 12-13: Universitetsmuseet
• 18. mars 14-15: Valmøte, Fellesadministrasjonen, Storsalen NG5
• 18. mars 17:00: Studentparlamentet inviterer til rektordebatt på Det akademiske kvarter
• 19. mars 13-14: Rektordebatt ved Det sentrale valgstyret

 Endringslogg: Det er museumsdirektøren, ikkje universitetsdirektøren, som har planlagt debattar saman med dekanane. Endra 16. februar kl 13.15.