NTNU-student smitta av korona. Andre studentar har fått karantene
Korona. Ein norsk utvekslingsstudent er smitta av korona-viruset, andre sit heime i karantene og NTNU ber studentar og tilsette som har vore i høgrisikoområde om å halda seg heime i to veker.
Publisert
Oppdatert
OBS! Denne artikkelen er mer enn tre år gammel, og kan inneholde utdatert informasjon.
Fleire studentar har fått karantene etter ha hatt praksis ved augeavdelinga ved Ullevaal sjukehus. Det var her dei første tilfella av koronasmitte i Noreg dukka opp. Studentane kom frå Universitetet i Oslo (UiO) og frå OsloMet. Det er snakk om elleve studentar frå Fakultet for helsevitskap og Fakultet for lærerstudier og internasjonale studier ved OsloMet og tretti medisinstudentar frå UiO, skriv OsloMet og Uniforum.
Student smitta på utveksling
Tysdag føremiddag var det i alt 32 tilfelle av kjend koronasmitte i Noreg. Alle dei som er smitta i Noreg skal ha band til Italia, skriv VG. Ingen skal vera alvorleg sjuke.
Me tilrår tilsette og studentar som er på reise eller som planlegg å reisa om å følgja med på UD sine reiseråd.
Anne Borg
Ein norsk student som er på utveksling i Italia, er smitta. Han er i Firenze, og skal ikkje vera alvorleg sjuk, skriv Universitetsavisa.
Fleire norske utdanningsinstitusjonar har studentar på utveksling til land med korona-utbrot, men som Khrono tidlegare har skrive, er det førebels ikkje planar om å henta desse heim.
Men utbrotet får konsekvensar for studentar som har praksis. I tillegg til studentane ved augeavdelinga, som må halda seg heime, får studentar frå Universitetet i Sørøst-Noreg, som skulle hatt praksis i Italia, ikkje reisa. Universitetet sender heller ikkje studentar som har vore i område med koronasmitte ut i praksis i Noreg. Studentane vil få ein alternativ plan som gjer at dei ikkje vert forseinka i studieløpet, skriv USN på sine nettsider.
I tillegg skriv fleire institusjonar at helsefagstudentar i praksis vert oppmoda om å gjera det same som andre som jobbar i helse- og omsorgssektoren: Halda seg heime i to veker dersom dei har vore i område med koronautbrot.
NTNU avlyser reiser
Khrono har skrive at Dag Rune Olsen, rektor ved Universitetet i Bergen, ikkje kjem seg til Kina som planlagt. NTNU avlyser eller utset alle reiser til Fastlands-Kina. Det same gjer dei med reiser til andre høgrisikoområde, som no er mellom anna Nord-Italia, Sør-Korea, Japan og Iran. I tillegg ber dei både studentar og tilsette som kjem heim frå reiser til desse områda om å halda seg heime i to veker.
— Me tilrår tilsette og studentar som er på reise eller som planlegg å reisa om å følgja med på UD sine reiseråd og informasjon frå Folkehelseinstituttet, seier NTNU-rektor Anne Borg til eigne nettsider.
Andre institusjonar seier det same som Folkehelseinstituttet skriv på sine nettsider: Dersom ein kjem heim frå område med smitte og har symptom på luftvegsinfeksjonar, bør ein halda seg heime.
