Havforskingsinstituttet varslar nedbemanning

NTNU har innvilga dei første sluttpakkane, og ved NMBU har tilsette vore innkalla til møte med nedbemanningsspøkelset lurande bak gardina. 

No er det Havforskingsinstituttet (HI) som varslar at det kan gå mot reduksjon i talet på tilsette. Ifølgje NRK har dei tilsette fått beskjed om at lønskostnadane må kuttast med om lag ti prosent over dei neste tre åra.

— Viss me ikkje gjer tiltak i det heile dei neste tre-fire åra, kan me risikera å enda opp med underskot på 50 til 100 millionar til saman, seier Nils Gunnar Kvamstø, direktør for Havforskingsinstituttet til statskanalen.

arendalsuka

Oddmund Hoel: Stillingskutt er den nye virkeligheten

Vil gjennomføra på seinhausten

Kvamstø seier at dei enno ikkje veit kor mange tilsette og kva avdelingar som vil verta råka av kutta.

— Vårt mål er å ha planane klare i løpet av eit par månader og at me kan begynna på gjennomføringa seint i haust.

Allereie i 2022 skreiv Khrono om dårlegare økonomi ved HI. Då var det forskingsskipet Kristine Bonnevie som vart teke ut av drift for å spara pengar, og det vart nedbemanning. 

— Dei siste ti-femten åra, har Havforskingsinstituttet hatt vekst i aktivitet og etterspurnad etter tenester. Tildelingar av pengar har vekse proporsjonalt med aktiviteten. Over tid resulterer dette i eit tankesett og ei leiing som ikkje nødvendigvis riggar seg for at inntektene får seg ein knekk, sa Kvamstø for knappe to år sidan.

den økonomiske nedturen

Nedbemanning og mindre under­visning. Nå må de styre med mindre penger

Har tilsettingsstopp

Berre nokre månader seinare kunne Khrono melda at det ikkje berre var HI sitt reiarlag som måtte spara pengar. Då vart det innført kutt for heile organisasjonen, som no har vel tusen tilsette.

Blant tiltaka var at tilsette som sluttar ved naturleg avgang ikkje vert erstatta og at mellombelse kontraktar ikkje vert forlenga.

— Me er jo allereie inne i ei nedbemanning, i den forstand at me det siste halvåret har hatt ein tilsettingsstopp og ikkje fylt ledige stillingar, seier Kvamstø til NRK no.

Terje van der Meeren, nestleiar i Forskerforbundet ved HI, seier til NRK at det vil vera ganske dramatisk dersom ti prosent av dei tilsette vert nedbemanna. 

— Det store spørsmålet er i kva grad dette vil gå utover vår evne til å gi råd til forvaltninga, seier han.