Norsk fagspråk er undervisaren sitt ansvar

Norge er såpass fleirspråkleg at me faktisk kan finna ein gyllen middelveg, gjerne ein kor, i hovudsak, undervisning er på norsk og forsking er på engelsk.

På måndag skreiv Ragnar Audunson i Khrono at undervisning naudsynt blir verre på engelsk, som ein reaksjon på Wetås som seier at Språkrådet fryktar konsekvensane av engelskspråkleg undervisning. Då NTNU la fram sin internasjonale handlingsplan i fjor, som sa at alle mastergradar i utgangspunkt burde vera på engelsk, blei det raskt sett opp ein underskriftskampanje, som no har 380 underskriftar. Eg er einig med Audunson i at engelsk undervisning nordmenn imellom må utgjera dårlegare undervisning.

Det manglar forsking på effekten av engelskspråkleg undervisning i ein norsk kontekst, men anekdotisk har det komme mange historier fram i lyset i den siste tida som illustrerer at nyanse og djupn er utfordringar, både for undervisarar og studentar som ikkje snakkar engelsk som morsmål. Det tek tid å bli vand til å undervisa på engelsk, særleg viss du forskar på norske fenomen og heile kvardagen din er på norsk. I høve der studentane òg er nordmenn som skal ut og jobba i Norge, som er dei aller fleste av dei, er det ikkje hensiktsmessig å undervisa på engelsk. Det er viktig at studentane kan snakka om faget sitt når dei kjem ut i arbeidslivet, som Språkrådet òg viser i ei bedriftsmeiningsmåling i haust.

Me kan likevel ikkje ignorera at forsking ikkje kjem langt på norsk. Det er ikkje rart at 90 prosent av dei akademiske publikasjonane i 2017 var skrivne på engelsk. Me kjem ikkje utanfor landegrensene viss me held oss på norsk. Sånn er det berre. Og viss forskinga vår skal gjera nokon forskjell i verda, må me kunna samarbeida utanfor landets grenser.

Det burde finst oppmuntring til å publisera tekstbøker og anna kursmateriell på norsk, men i forskinga er det såpass mange små underfelt at det ikkje er hensiktsmessig å bruka ressursar på å aktivt omsetta til norsk, såframt stoffet ikkje skal undervisast. I mitt eige fagfelt finst det ikkje norske omgrep for ‘property concepts’ eller ‘scalarity’, men viss eg nokon gong skulle undervist om det, ville det jo vore fullt mogleg å laga norske omgrep for disse. Det skal vera undervisaren sitt ansvar å legga til rette for godt norsk fagspråk, ikkje studenten.