Har brukt ein million på varslingssak mot direktør. Får ekstern coach

Havforskingsinstituttet er i gang med ein «prosess» som skal bidra til å få orden på arbeidsmiljøet ved HI Digital, ei avdeling ved det marine forskingsinstituttet, eitt av dei største i sitt slag i Europa. 

Eitt av tiltaka som er planlagt er bruk av ekstern coach. Slik Khrono forstår det skal denne gi den omstridde avdelingsdirektøren støtte i leiarstillinga.

Det er sett av cirka 120.000 kroner til oppdraget.

— Dei tilsette, leiinga og partane er no blitt einige om kva slags prosess ein skal køyre vidare, seier kommunikasjonsdirektør Marie Hauge. 

Hausten 2024 fekk leiinga ved Havforskingsinstituttet inn tre separate varsel mot avdelingsdirektør ved HI Digital, Linn Cecilie Moholt.

Der blei ho skulda for å skapt ein fryktkultur i avdelinga, etter det som ifølgje varslarane skulle ha vore ei rad episodar med kjefting, truslar om personalsaker, utfrysing og trakassering. Dette skulle ha funne stad både ein til ein og i opne møte. 

Moholt, som vart tilsett som direktør våren 2023, har avvist skuldingane. Ho ønskjer ikkje å kommentere saka til Khrono. 

«Subjektiv oppfattelse»

Havforskingsinstituttet har til no betalt fakturaer på 968.000 kroner i samband med saka. Pengane er i hovudsak gått til advokatbyrået Arntzen deBesche, som fekk i oppdrag å granske varslingane.

Granskingsrapporten, som Havforskingsinstituttet har gitt Khrono tilgang til, konkluderte med at det ikkje var «funnet bevist» at avdelingsdirektøren var «årsaken til en fryktkultur, maktmisbruk og manglende ytringsklima». 

I juridisk forstand var det dermed ikkje grunnlag for å hevde at det fanst kritikkverdige forhold i avdelinga, slik det er definert i arbeidsmiljøloven, ifølgje rapporten.

Derimot slo advokatane fast at fleire av dei tilsette «har en reell, subjektiv oppfattelse av et utrygt arbeidsmiljø».

Det er dette som no har ført til at Havforskingsinstituttet har sett i gang eit omfattande prosjekt ved HI Digital, med vekt på «kommunikasjon, samarbeid, organisering og ledelse.»

— I regi av arbeidsmiljøutvalet (AMU) er det blitt nedsett ei partssamansett arbeidsgruppe, som involverer tilsette, leiing og personalavdeling. Gruppa skal ha det operasjonelle ansvaret for å følgje opp prosessen vidare, seier kommunikasjonsdirektør Hauge.

4. februar skal det haldast informasjonsmøte for alle tilsette ved HI Digital, slik at  «arbeidsplassutviklingen i best mulig grad sikres tillit blant alle», ifølgje referatet frå arbeidsmiljøutvalet 28. januar.

Digital transformasjon

Ifølgje granskingsrapporten er det ulike syn på delar av det som blir omtalt som ein «digital transformasjon» som har ført til konflikt mellom direktøren og tilsette på avdelinga.

 På HI Digital dreier dette seg om etablering av ei ny, skybasert plattform for lagring og deling av forskingsdata som går under namnet OceanLink. 

I samband med innføringa av plattforma tok avdelingsdirektøren initiativ til å omorganisere avdelinga. 

Det er registrert 56 tilsette ved HI Digital. I tillegg har avdelinga hyra 24 eksterne konsulentar. Konsulentane blei i hovudsak leigd inn for å arbeide med OceanLink. 

Utifrå det som kan lesast frå rapporten har det vore usemje om gjennomføringa av den digitale transformasjonen og etableringa av OceanLink. Konfliktlinja har gått mellom direktøren og konsulentane på den eine sida og fast tilsette på den andre. 

«Enhver tilbakemelding blir tolket i verste mening, og det å stille spørsmål blir sett på som en motstand mot digitaliseringsprosessen. Dette på tross av at man utad blir oppfordret til å stille spørsmål, noe som burde verdsettes i en akademisk institusjon», heiter det i eitt av dei anonyme varsla. 

Kjenner seg ikkje igjen

16 personar er blitt intervjua i samband med granskinga, 11 av dei frå HI Digital, resten frå andre delar av instituttet. 

Så godt som alle har gitt uttrykk for at arbeidsmiljøet på avdelinga har «endret seg til det negative, og at dette kan tidfestes til tiden etter Omvarslede tiltrådte som avdelingsdirektør våren 2023», står det i granskingsrapporten.

Dei som er intervjua gir samstundes uttrykk for at det «ikke lengre er et reelt ytringsklima ved HI Digital» og at dette har direkte samanheng med leiarstilen til direktøren.

Advokatane si vurdering er mellom anna at direktøren det er varsla imot «til en viss grad kan ansvarliggjøres for å ikke ha sørget for at informasjonsvakuumet har blitt fylt, men utfordringene kan ikke alene tilskrives henne».

I rapporten heiter det også at «det kan legges til grunn at det er ansatte som har en subjektiv opplevelse av blant annet isolasjon og utilbørlig opptreden».

I intervju med granskarane har direktøren forklart at ho ikkje kjenner seg igjen i påstandane om fryktkultur, manglande ytringsklima og eit uforsvarleg arbeidsmiljø. 

Tvert om er det hennar meining at  «hennes lederstil og adferd ikke har gitt grunnlag for kritikken i varslene». Ho forklarer at ho er «svært opptatt av takhøyde, og mener at et godt ytringsklima legger til rette for gode faglige diskusjoner».

Vil ikkje kommentere

Arbeidsmiljøutfordringane kjem parallelt med at Havforskingsinstituttet må nedbemanne som følgje av dårleg økonomi. Totalt skal det kuttast om lag 100 stillingar. Instituttet har vel 1000 tilsette.

Khrono har bede havforskingsdirektør Nils Gunnar Kvamstø om å kommentere arbeidsmiljøutfordringane ved instituttet, men har fått avslag. 

— Frå starten av er medieførespurnader i denne saka handtert av meg, som ansvarleg for kommunikasjon og samfunnskontakt. Det står ikkje i motsetning til at administrerande direktør Nils Gunnar Kvamstø har det overordna ansvar for arbeidsmiljøet ved HI, seier kommunikasjonsdirektør Marie Hauge. 

* Endringslogg 28.02.25, kl. 11.28: I saka stod det opphavleg at ein coach skal «hjelpe den omstridde avdelingsdirektøren med å korrigere leiarstilen». Dette er ifølgje Havforskingsinstituttet ikkje rett, og formuleringa er endra til «gi støtte i leiarstillinga».

havforskningsinstituttet

Varsler i Bergen: Beskyldes for fryktkultur