Lukka dørene for å diskutere Dag Rune Olsens NTNU-flørt
Rektorjobb. Saka stod ikkje på dagsorden, men det gjekk ikkje lang tid før styret ved Universitetet i Bergen lukka dørene på dagens møte. — Vi er nøydde til å ta denne diskusjonen, sa styrerepresentant Inga Berre.
OBS! Denne artikkelen er mer enn tre år gammel, og kan inneholde utdatert informasjon.
Rektor ved Universitetet i Bergen har som kjent søkt den ledige åremålsstillinga som rektor ved NTNU. Til Khrono har han sagt at han har fått signal om at han truleg blir kalla inn til intervju for jobben.
Les også: Kan verta nyval ved Universitetet i Bergen
Olsen er vald rektor ved universitetet heilt fram til 2021. Den spesielle situasjonen har derfor ført til spekulasjonar og utløyst ei rekke prinsipielle og tekniske spørsmål som styret og universitetsleiinga må ta stilling til:
Når skal og kan han eventuelt gå av? Kven skal ta over? Når skal eit nytt rektorval finne stad?
Olsen har grubla litt
Desse spørsmåla ønskjer styrerepresentant Berre ikkje å seie så mykje om utanfor styrerommet.
— Når ein får opplysningar om forhold som handlar om habilitet, må styret i tråd med forvaltningsloven ta opp og avgjere korleis ein skal handtere dette, seier Berre til Khrono, utover det vil ho ikkje kommentere spørsmål knytt til Olsens eventuelle exit.
Det er universitetsstyret som skal bestemme korleis Olsens eventuelle avgang skal skje – og tida er knapp: NTNU-styret planlegg å tilsetje ny rektor i januar neste år.
Olsen sjølv la opp til ei kort orientering om status då han opna møtet i Bergen torsdag, men styret ønskte altså å diskutere saka nærare i einerom.
— Eg har grubla litt på korleis situasjonen påverkar min habilitet, og eg har tatt kontakt med Kunnskapsdepartementet, opplyste Olsen.
Ein av åtte konkurrentar
Tilbakemeldingane er at han sjølv må vurdere sin habilitet, men dersom styret skal behandle saker som ikkje berre involverer UiB, men også NTNU, vil Olsen openbert måtte trekke seg tilbake.
Anne Borg er for tida konstituert rektor ved NTNU og er saman med Olsen ein av åtte konkurrentar om rektorstillinga der.
Tidlegare NTNU-rektor Gunnar Bovim gjekk av i august i år, nettopp av habilitetsgrunnar. Bovim gjorde det då kjent at kjærasteforholdet til ein av direktørane ved NTNU, Merete Kvidal, ikkje var foreinleg med å fortsetje i jobben.
Logg inn med en Google-konto, eller ved å opprette en Commento-konto gjennom å trykke på Login under. (Det kan være behov for å oppdatere siden når man logger inn første gang)
Vi modererer debatten i etterkant og alle innlegg må signeres med fullt navn. Se Khronos debattregler her. God debatt!