digital læring
Blikstad-Balas skal leia gruppe som skal jobba for betre læring
Ei tverrfagleg gruppe, med mellom anna seks professorar, skal vurdera bruken av digital læringsanalyse i grunnopplæringa. Målet er betre læring for elevar og studentar.
Publisert
Sist oppdatert
OBS! Denne artikkelen er mer enn tre år gammel, og kan inneholde utdatert informasjon.
Marte Blikstad-Balas er professor i norskdidaktikk ved Institutt for lærarutdanning og skuleforsking ved Universitetet i Oslo og skreiv doktorgrad om korleis elevar i den vidaregåande skulen brukar PC i undervisninga. No skal ho leia eit regjeringsnedsett utval som skal sjå på korleis ein kan få betre læring, både for grunnskuleelevar, vidaregåande-elevar og studentar.
Ekspertgruppa, som er tverrfagleg, skal vurdera bruken av digital læringsanalyse i grunnopplæringa, høgare yrkesfagleg utdanning og høgare utdanning.
Analyse av digitale læringsaktivitetar
Digital læringsanalyse er analyse av data som er innhenta frå læringsaktivitetane til elevar og studentar. Det kan til dømes vera analyse av data frå elevane sine digitale læremiddel, eller frå studentane sine læringsplattformer.
– God bruk av informasjonen me har frå digitale læringsaktiviteter kan bidra til å utvikla pedagogisk praksis og gi betre læring for elevar og studentar. Slik læringsanalyse vil kunne verta ein viktigare del av framtidas utdanning. Samstundes treng vi å vite meir om korleis digital læringsanalyse påverkar kva elevane og studentane lærer, og å sjå nærare på utfordringar knytt til personvern, juss og etikk, seier kunnskaps-og integreringsminsiter Guri Melby (V) i ei pressemelding.
I Handlingsplan for digitalisering av grunnopplæringa, som kom i 2020, vart det sagt at det skulle setjast ned eit ekspertutval.
Fleire meritterte undervisarar
I utvalet sit ekspertar på mellom anna etikk, teknologi og juss. Ein av dei er professor Barbara Wasson. Ho leiar Slate - Centre for the Science of Learning & Technology ved Universitetet i Bergen. Ein annan er jussprofessor Malcolm Langford frå Universitetet i Oslo. Han har mellom anna markert seg som svært oppteken av god digital undervisning. Som Blikstad-Balas er han òg merittert undervisar ved UiO.
I pressemeldinga heiter det at ekspertgruppa skal gi Kunnskapsdepartementet betre grunnlag for slutningar om digital læringsanalyse og adaptive læremiddel, prøver og testar. Ho skal òg vurdera problemstillingar knytt til pedagogikk, juss og etikk og til personvernomsyn.
– Eg gler meg til å ta del i dette svært viktige arbeidet, og til alle dei spennande diskusjonane vi vil ha i gruppa, seier Blikstad-Balas.
Ekspertgruppa skal levere utgreiing i to delar. Den første delen skal vera ferdig innan 1. juni 2022. Sluttrapporten skal vera ferdig innan 1. juni 2023.
