OBS! Denne artikkelen er mer enn tre år gammel, og kan inneholde utdatert informasjon.
Innbyggjarar i Dalane, som er dei sørlegaste kommunane i Rogaland, vil no kunne ta sjukepleieutdanning i heimregionen. Det syter eit samarbeid med Universitetet i Agder (UiA) føre.
Dalane Tidende skriv at 40 studieplassar ved UiA vert distriktsplassar, som innbyggjarar i Dalane òg vil kunne søkja på. Planen er lokale samlingar, men studentane vil måtte reisa til Kristiansand for å få gjort noko lab-arbeid og ha nokre samlingar der.
- Dette er ei kjempesak for regionen. No kan me tilby sjukepleiarutdanning til dei som ikkje kan reisa vekk for å studera. Og me kan få dekka ein del av det behovet kommunane har for sjukepleiarar, seier Gudrun Ellingsen, fagleiar for Dalane utdanningssenter, til Dalane Tidende.
Regionen hadde tidlegare eit samarbeid med dåverande Høgskolen i Stavanger, men dei siste sjukepleiarane som tok utdanninga si i Dalane vart uteksaminerte i 2007.
(Hilde Kristin Strand / Khrono)
