Styret ved UiB diskuterer Olsen si vidare rolle

— Det er ikkje berre rett og rimeleg, men òg naudsynt, at mi rolle og om det kan verta interessekonflikter vert drøfta.

Det sa Dag Rune Olsen før han fekk universitetsstyret med seg på å lukka møtet.

Som Khrono har skrive, har Olsen takka ja til stilling som rektor ved Universitetet i Tromsø - Norges arktiske universitet, frå 1.august neste år. Han sit som valt rektor ved UiB fram til same dato.

Torsdag sa Olsen til Khrono at han vil diskutera saka med styret. Forskerforbundet på UiB har vore tydeleg på at dei meiner det er ryddigast at Olsen går av som rektor med det same.

— Sjølv om det er eg som skal bestemma om eg skal stå ut perioden eller tre til side, vil det styret gir av råd vera gjeldande for mi avgjerdsle. Det er viktig å lytta til deet høgste organet ved UiB, sa Olsen i innleiinga til styremøtet.

Både Olsen og Kjell Bernstrøm, som har siste dag som universitetsdirektør ved UiB, sa seg inhabile i sakshandsaminga.