Sju vil verta dekan i Volda. Omplassert dekan søkjer på nytt.

Audhild Gregoriusdotter Rotevatn søkjer dekanstillinga ved Avdeling for mediefag på nytt. Ho er tilsett i stillinga i dag, men er for tida omplassert etter ei arbeidsmiljøkonflikt. Åremålet hennar går ut i sommar.

— Eg søkjer fordi eg har starta på ei viktig omstilling for avdelinga og medifaga. Eg har levert det styret har bestilt i mi første periode; økonomisk, fagleg og administrativt. No må arbeidet halde fram og avdelinga må jobbe i fellesskap for å løyse utfordringane framover, skriv Rotevatn i ein kommentar til Khrono, og ho legg til:

— Avdeling for mediefag har føresetnader for å vere Noregs viktigaste utdannar i yrkeseretta medeifag framover, om ein gjer kloke val i tida som kjem.

Les også:

Departementet sender Volda-klage i retur

Den andre søkjaren med bakgrunn frå akademia er Tor Bang. Han er førsteamanuensis ved Institutt for kommunikasjon og kultur ved BI.

Dette er søkjarane:

Aina Voll (33), miljøterapeut

Martin Maier (35), Senior prosjektøkonom/prosjektstøtte

Henrik Wilhelm Jørgensen (57), Sjefskonsulent

Nils-Jarle Sætre (49), arbeidssøker

Tor Bang (64), førsteamanuensis

Pål Aarsæther (50), lektor m/tilleggsutdannelse

Audhild Gregoriusdotter Rotevatn (44), dekan

Ein kvinneleg søkjar har trekt seg, går det fram av søkjarlista.

Søknadsfristen vart utvida etter at høgskulen inngjekk avtale med eit rekrutteringsfirma for å finna søkjarar til stillinga. Rektor Johann Roppen skriv i ein sms til Khrono at høgskulen no ikkje arbeider vidare med andre kandidatar.

Les også: Volda-dekanen vart beden om å gå av

(Saka er oppdatert kl 10.57 med kommentar frå Audhild Gregoriusdotter Rotevatn kl. 10.58. Saka er òg oppdatert kl 12.08, der informasjonen om at Rotevatn er den einaste søkjaren med mediebakgrunn er fjerna. Dette var ikkje rett).