Ønskjer politisk leiing som jobbar for gode vilkår for forsking, undervisning og formidling

Fakta

Adventsintervju 2022

• I dagane fram mot jul vil du møta kjende og ukjende personar i og rundt universiteta, høgskulane og institutta våre.
• Dei skal få oppsummera året som har gått, og dei skal få koma med ynske for 2023.
• I dag møter du Øystein Vangsnes. Han er professor i nordisk språkvitskap ved UiT Noregs arktiske universitet.

Professor i nordisk språkvitskap, Øystein Alexander Vangsnes, gøymer seg bak luke nummer 21 i Khronos adventskalender.

— Korleis vil du oppsummera 2022 med universitets- og høgskulebrillene på?

— 2022 er jo året der ein for alvor har fått kjensla av å stå framfor nokre bratte bakkar i tida som kjem. Alt bråket rundt Forskingsrådet og også stadige økonomiske innstrammingar elles i sektoren ber bod om trongare kår for forsking og rekruttering til forsking, i alle fall på kort sikt. Som involvert i ein av dei to SFF-søknadane som vart funne støtteverdige, men som likevel ikkje fekk finansiering, kjenner eg lite takksemd for den linja noverande regjering har overfor sektoren.

— Kva er det kjekkaste du har vore med på i universitets- og høgskuleverda i år, og kvifor?

— Det kjekkaste for meg er at me endeleg – etter korona og vanskar med rekruttering – har komme skikkeleg i gang med aktiviteten i det forskingsrådsfinansierte prosjektet Multilectal Literacy in Education som eg leier. Me har både hatt den første større fysiske samlinga og gjennomført større datainnsamlingar. Det er veldig kjekt og veldig spennande!

— Kva har vore den største utfordringa i 2022, slik du ser det?

— Lokalt på UiT Noregs arktiske universitet har trongare økonomiske rammer falle saman med innføringa av nytt administrativt system. Det har skapt både frustrasjon og irritasjon i arbeidskvardagen, og det verste er kanskje kjensla av å vera heilt hjelpelaus i møtet med ting som ikkje fungerer.

— Kva er ditt juleynske for universiteta og høgskulane?

— Eg ønskjer meg ei politisk leiing for sektoren som tek han på alvor og som jobbar for at det skal vera gode vilkår for forsking, undervisning og forskingsformidling i toppklasse. Og så ønskjer eg at studentane igjen skal trivast og ha gode læringsfellesskap etter at dette synest å ha fått ein knekk under koronapandemien.

— Kva skal du gjera i jula?

— Eg skal feira jul saman med storfamilien på mi side i Sogn og sidan nyttår heime i Tromsø med familie og vener der.