korona

Gjer studentane klare til korona­vaksinering

I Haugesund får sjukepleiarstudentar opplæring i korleis dei skal setja koronavaksinar. Også fleire andre stader i landet vert studentar bedne om å bidra.

Karianne Kristoffersen Ferkingstad og Janne Alice Tangjerd, begge sjukepleiarstudentar i Haugsund, trenar på å setja vaksine på kvarandre.
Publisert Oppdatert

OBS! Denne artikkelen er mer enn tre år gammel, og kan inneholde utdatert informasjon.

Sjukepleiarstudentar ved Høgskulen på Vestlandet (HVL) si avdeling i Haugesund øver no på å setja vaksinar. Slik kan dei vera klare til å bidra til koronavaksinering.

Det var NRK som først skreiv om saka. Dei skriv at vaksineopplæringa er eit tilbod til sjukepleiarstudentar på andre studieår. På sikt skal også tredjeårsstudentane få tilbod om same kursing.

— Alle som kan, bør bidra, seier student Karianne Kristoffersen Ferkingstad til NRK.

Samarbeid i Agder og Bergen

Haugesund kommune er naturleg nok glade for at studentane vil bidra. Helsesjef Tone Berntsen Steinsvåg seier til NRK at hjelp utanfrå er heilt avgjerande.

Også fleire andre kommunar får hjelp frå studentar. Instituttleiar Mariann Fossum ved Institutt for helse- og sjukepleievitskap ved Universitet i Agder. Ho skriv i ein e-post til Khrono at universitetet har eit samarbeid med Grimstad kommune. UiA kontaktar både studentar og tilsette med spørsmål om dei vil delta som frivillige i vaksineringsarbeidet.

— Studentar og tilsette vil då få opplæring frå kommunen, seier Fossum.

Ei liknande løysing har ein i Bergen. Per Bakke, dekan ved Det medisinske fakultetet ved Universitetet i Bergen (UiB) seier til Khrono at UiB har vorte kontakta av kommunen.

— Me har spreidd spørsmålet til medisinstudentane. Det er kommunen som har opplæringa, seier Bakke.

VID vitskapelege høgskule har fått spørsmål frå Bærum kommune om å hjelpa til med vaksineringa. Det skriv helsedekan Benedicte Strøm i ein epost til Khrono.

— Me har òg både sjukepleiarstudentar og studentar i helsesjukepleie som ønskjer å hjelpa til, så eg er òg i kontakt med Oslo kommune, seier ho.

NTNU låner ut lokale

Også i Oslo tek kommunen i bruk studentar til vaksinering. Khrono har tidlegare skrive at kommunen tek imot 50 studentar i praksis ved vaksinesentra sine.

I Oslo vil også noko vaksinering kunne skje i OsloMet sine lokale. Også i Trondheim kan det verta vaksinering på universitetet. NTNU låner den tidlegare postterminalen, som elles er brukt til eksamensavvikling, gratis ut til kommunen slik at det kan verta gjennomført massevaksinering der. Dette skriv Universitetsavisa.

Saka er oppdatert 29.1 kl 10.16 med opplysningar om VID.

Powered by Labrador CMS