11 vil verta direktør i Bergen

Universitetet i Bergen skal ha både ny rektor og universitetsdirektør i løpet av det neste året.

Kjell Bernstrøm fyller 69 år i haust og går av som universitetsdirektør ved Universitetet i Bergen (UiB). No søkjer UiB etter hans etterfølgjar. Stillinga var eigentleg lyst ut i vår, men på grunn av koronaviruset vart søknadsfristen utsett til 16. august.

På lista står 11 namn: Fem kvinner og seks menn. Ei kvinne og ein mann er unntekne offentlegheit.

Varsla at han ville søkja

Tore Tungodden, som i dag er assisterande universitetsdirektør, står på søkjarlista. Før fristen gjekk ut, stadfesta han til Khrono at han hadde tenkt å søkja, og varsla om dette internt.

— Det er ingen løyndom at hjarta mitt bankar for Bergen og UiB, og det ville vera utenkjeleg å ikkje søkja det eg ser på som den mest givande jobben, seier Tungodden.

Han vart tilsett som assisterande universitetsdirektør i 2015. Då hadde han vore konstituert i stillinga i eitt år, etter at Kari Tove Elvbakken brått gjekk av. Bernstrøm kom frå stillinga som økonomidirektør, og vart først konstituert som universitetsdirektør, deretter tilsett i eit åremål.

Ein søkjer mykje

Ein av dei andre søkjarane er Silje Vallestad. Ho har tittel konsulent, men er mest kjent som gründer, og stod mellom anna bak mobilselskapet Bipper.

Thorbjørn Gaarder har òg søkt. Han har vorte kjent som mannen som søkjer alle stillingar. Gaarder er advokat, men vart uføretrygda for 15 år sidan etter ei hjernebløding.

Tilsetjing i september

Då Bernstrøm vart tilsett, etterlyste to av styremedlemmene fleire kandidatar. Dei sa til På Høyden at dei gjerne skulle hatt ein direktør som kunne tilføra Universitetet i Bergen nye impulsar.

Tungodden er den einaste på den offentlege delen av søkjarlista som er UiB-tilsett. Han er òg den einaste som kjem frå sektoren.

— Dette er den lista me har, seier UiB sin HR-direktør Sonja Dyrkorn.

Ho seier at eit tilsettingsutval med medlemmer frå universitetsstyret og eit eksternt rekrutteringsbyrå no jobbar saman, og at planen er å tilsetja den nye direktøren i universitetsstyremøtet i september.

Khrono gjer merksam på at Tore Tungodden er styreleiar i Khrono.