Tre hemmelege søkjarar til dekanstilling i Volda

Tidleg i mars vart det kjent at det ikkje vart tilsett nokon ny dekan ved Avdeling for mediefag ved Høgskulen i Volda. Tor Bang, som fekk tilbod om stillinga, takka nei.

No har stillinga vorte lyst ut på nytt, med seks søkjarar. Tre av dei har fått namnet sitt unnteke offentlegheit (sjå faktaboks), av dei er to kvinner og ein mann. Høgskuledirektør Karen Lomeland Jacobsen skriv i ein epost til Khrono at styret tek sikte på å tilsetja dekan i styremøtet 11. juni.

Fekk ikkje ny periode

Som Khrono har skrive, har det vore ei konflikt ved Avdeling for mediefag, som gjorde at dåverande dekan Audhild Gregoriusdotter Rotevatn vart mellombels omplassert før studiestart i august i fjor. Åremålet hennar som dekan går i ut i sommar, og Rotevatn vat blant søkjarane då stillinga vart lyst ut før jul. Ho fekk ikkje jobben, og sa at ho ikkje var overraska over det. Like før påske vart det kjent at Rotevatn vert ny direktør for Musea på Sunnmøre.

— Det var godt å få lukka den døra til Høgskulen i Volda. Det har vore ein ni månaders langt mareritt som eg er glad for å vera ferdig med, sa Rotevatn til Khrono, og fortalde at ho hadde levert oppseiinga si.

Rotevatn har, via fagforeininga Samfunnsviterne, klaga omplasseringa inn for Kunnskapsdepartementet. Saka er førebels ikkje ferdig handsama.

Når høgskulestyret skal ha digitalt styremøte torsdag, står dekansituasjonen ved AMF på sakskartet. Det skal vera ei munnleg utgreiing om saka bak lukka dører, heiter det. Direktør Jacobsen skriv at handsaminga skjer på denne måten fordi det handlar om tilsetjingsforhold.

— Odd Ragnar Hunnes er framleis vikarierande dekan. Kva som skjer framover må me koma attende til, skriv Jacobsen.

Rektor Johann Roppen seier til Khrono at han håpar den nye dekanen kan vera på plass tidlegast råd. Med tilsetjing i juni kan det ta noko tid dersom den som vert tilsett må jobba ut oppseiingstid ein annan stad.

— Me har ikkje hatt intervju endå, men blant dei som jobbar med denne saka er det optimisme, seier Roppen.

Frå Danmark

Blant søkjarane som har namnet sitt på den offentlege lista, er Kate Kartveit. Ho er førsteamanuensis ved Danmarks medie og journalisthøjskole. Pål Aarsæther søkte også førre gong stillinga vart lyst ut. Han er i dag leiar for Norsk Lektorlag i Møre og Romsdal.

Digitalt styremøte

I tillegg til dekansituasjonen ved AMF skal styret mellom anna handsama to saker knytt til koronasituasjonen, dei skal handsama høyringsuttale om forslaget til ny universitets- og høgskulelov og dei skal få ein presentasjon om planane for campusutvikling.

Møtet er digitalt, og vert difor ikkje strøyma. Men opptak av møtet skal verta lagt ut i ettertid. Sakslista finn du her.