Henriette Seim stiller til val i NSO
— Det er ikkje alltid kult å seia at ein er NLA-student, seier Henriette Seim. No stiller ho til val i Norsk studentorganisasjon.
Publisert
Oppdatert
OBS! Denne artikkelen er mer enn tre år gammel, og kan inneholde utdatert informasjon.
— Alle studentar i Noreg stiller ikkje på lik linje, seier Henriette Seim.
23-åringen er på siste semester av ei bachelorgrad i økonomi og administrasjon ved NLA Høgskolen. Ho viser til at høgskulen ho studerer ved ikkje er blant dei største og mest kjente – men har fått mykje mediemerksemd det siste halvåret, særleg knytt til homofilispørsmålet.
— Det er ikkje alltid kult å seia at ein studerer ved NLA, seier Seim.
Landsmøte utsett
No stiller ho til val i Norsk studentorganisasjon (NSO), som likestilling- og velferdsansvarleg. NSO skulle hatt landsmøte like etter påske, men førebels er dette utsett på ubestemt tid. Grunn: Koronautbrotet.
— Det er spesielt å stilla til val no, seier Seim.
Ho sit i studentparlamentet og læringsmiljøutvalet ved NLA, og i den læringsmiljøpolitiske komiteen i NSO.
— No er eg ferdig med ei bachelorgrad, og kjenner at eg har meir å bidra med. Eg stiller til val meir på motivasjon enn røynsle, eg har ikkje hatt heiltidsverv slik mange andre har, seier Seim.
SHoT viktig
Ho peikar på Studentane si helse og trivselsundersøking (SHoT) som ei av sakene som vil vera viktig òg det komande året.
—Men eg kan ikkje finna opp hjulet på nytt. Det er allereie i gang ein del kule prosjekt som eg vil vidareføra, seier Seim.
Les meir om dei andre som stiller til val her.
