havforsking

Felles norsk-russisk forskingstokt i gang

Forskingsskip frå Noreg og Russland er på veg til Barentshavet for å gjennomføre det årlege fellestoktet.

Forskingsfartøyet «G.O. Sars» er igjen på veg nordover for delta i det norsk-russiske økosystemtoktet.

Foto: Njord V. Svendsen

Tekst: Njord V. Svendsen njord.svendsen@khrono.no

Publisert 18.08.2023 - 10:23

Medan alt anna institusjonelt forskingssamarbeid med Russland er lagt på is, står det eine unntaket ved lag.

Denne veka er forskingsfartøy frå Havforskingsinstituttet og det russiske havforskingsinstituttet i Murmansk (VNIRO) på veg nordover for å gjennomføre det felles forskingstoktet i Barentshavet.

Så langt går alt etter planen, får Khrono stadfesta frå Havforskingsinstituttet.

FAKTA

Havforskingsinstituttet og Russland

Havforskingsinstituttet har hovudkontor i Bergen og avdelingskontor i Tromsø. Med sine cirka 1100 tilsette er det eitt av dei største marine institutta i Europa.
Samarbeidet med Russland har vart sidan 1958, då sovjetiske havforskarar første gong kom til Bergen.
Havforskingsinstituttets samarbeid med Russland skjer i hovudsak gjennom det sentrale russiske fiskeriforskingsinstituttet VNIRO si nordlege avdeling i Murmansk, som tidlegare bar namnet PINRO.

Tett samarbeid

«Inntil vidare» vart Havforskingsinstituttet gitt dispensasjon då Noreg stengde ned alt anna institusjonelt forskingssamarbeid med Russland etter krigsutbrotet i Ukraina i 2022.

les også

I Barentshavet er Noreg og Russland allierte og forskarane på same lag

Sidan det i dag knapt finst andre offisielle kanalar for dialog med Russland, har havforskarsamarbeidet også ei utanrikspolitisk side, ikkje minst fordi det finn stad i det militærstrategisk brennbare Barentshavet.

Økosystemtoktet er blant dei mest omfattande i verda i sitt slag og er avgjerande for den felles forvaltninga av økosystemet og fiskeressursane i Barentshavet. Innsamlinga av data frå toktet legg grunnlaget for dei årlege fiskeriforhandlingane der kvotefordeling mellom Noreg og Russland/Sovjetunionen er blitt fastsett sidan 1976.

Sjølve toktet, som går over fleire veker i både norsk og russisk sone, blir gjennom året planlagt i møter mellom norske og russiske havforskarar. Forskarane samarbeider også tett i etterkant med analysane av data.

Politisk side

Russland vart i fjor kasta ut av det internasjonale havforskingsrådet (ICES), som er organet der data frå toktet har blitt handtert og formidla inn til den norsk-russiske fiskerikommisjonen.

Etter ekskluderinga av Russland har samarbeidet vore bilateralt, direkte mellom norske og russiske forskarar.