Desse vil skriva rektor Rice sine talar

Noregs miljø- og biovitskapelege universitet (NMBU) har nyleg lyst ut to stillingar knytt til kommunikasjon. Den eine stillinga har tittelen «senior kommunikasjonsrådgiver samfunnskontakt og lederstøtte», og skal altså jobba opp mot leiinga ved universitetet.

På søkjarlista står mellom anna namnet til fleire noverande og tidlegare studentpolitikarar:

Tuva Todnem Lund er avtroppande leiar i Norsk studentorganisasjon (NSO). Line Willersrud er politisk rådgivar i same organisasjon. Det er òg Jørgen Aagedal Sundt - og begge desse har søkt stillinga.

Jin Sigve Mæland har tidlegare mellom anna vore studentrepresentant i universitetetsstyret ved Universitetet i Bergen og har site i arbeidsutvalet i studentparlamentet same stad. I dag er han politisk rådgivar for bergensordførar Rune Bakarvik.

les også:

Høyre henter ny studentleder

Vil attende

— Eg er veldig glad i NMBU og gler meg til å koma attende, skriv Lund i ein sms til Khrono.

Ho har vore både student og studentpolitikar ved NMBU før ho vart nasjonal studentpolitikar.

— Det har skjedd mykje med universitetet dei siste åra, og eg har veldig lyst til å vera med og jobba for universitetet vidare. Eg har lært enormt mykje dei siste åra, og vil gjerne bruka den kunnskapen vidare òg, seier Lund.

Men om ho ikkje får jobben er det inga katastrofe:

— Eg har ein masterplass som ventar, som eg òg er veldig motivert for, seier Lund, som etter planen skal verta lektor.

Skal gjera NMBU meir synleg

Arbeidsoppgåvene vert mellom anna å skriva talar, innlegg og kronikkar på vegne av leiinga. Ein skal òg jobba strategisk for å gjera universitetet meir synleg og styrka berekraftsposisjonen deira. I tillegg skal ein følgja med på relevante politiske saker og prosessar, føreslå og utarbeida tiltak og utspel, heiter det i utlysinga.

I tillegg til tidlegare og noverande studentpolitikarar har fleire med kommunikasjonsbakgrunn søkt. Dag Nestegard er senior kommunikasjonsrådgivar i Kunnskapsdepartementet, og Trond Larsen har same stilling i Helsedirektoratet. Laila Kjeldsen og Sigvor Melve kjem begge frå NAV, medan Åsmund Lang og Per Christian Langset kjem frå arbeidsgivarorganisasjonar.

les også:

Ny kommunikasjons- og markeds­direktør ved NMBU

Søkjer etter kommunikasjonssjef

Anette Alexandra Dey står òg på søkjarlista. Ho er kommunikasjonsrådgivar i bydel Frogner i Oslo. Dey har også søkt den andre kommunikasjonsstillinga ved NMBU: Kommunikasjonssjef. Her har òg mellom andre Pål Grandal og Silje Kjeseth-Wynter søkt. Dei kjenner forskings- og udanningssektoren; Grandal er i dag tilsett som kommunikasjonsrådgivar ved Universitetet i Agder og Kjeseth-Wynter er tilsett ved NMBU.

Malin Stensønes er konserndirektør i forlaget Aschehoug, mens Kjersti Oppen har bakgrunn fra Schibsted. Der var hun kommunikasjonssjef, før hun gikk til Virke Trening, har Medier24 tidligere skrevet.