Rektor Dag Rune Olsen etterlyser meir innovative innkjøp
Innkjøp. Dei fire eldste universiteta vil ha ein eigen reisebyråavtale fordi dei ikkje er nøgde med den staten har.
OBS! Denne artikkelen er mer enn tre år gammel, og kan inneholde utdatert informasjon.
— Universitets- og høgskulesektoren ønskjer å ta klimavennlege val, skreiv Dag Rune Olsen, rektor ved Universitetet i Bergen, i eit debattinnlegg som er publisert i både Aftenposten og Khrono.
I innlegg peikar Olsen på at det er umogleg å bestilla togreiser gjennom den reisebyråavtalen staten no har. I tillegg stiller ikkje staten, ved Direktoratet for forvaltning og IKT (Difi), krav om miljøsertifisering for dei selskapa som leverer tilbod. Dei såkalla Bott-universiteta, altså universitetet i Bergen, Oslo, Tromsø og NTNU, har difor varsla at dei ønskjer å trekkja seg frå avtalen.
Me har gjort ei anna vurdering enn Difi, og meiner at det er mogleg å stilla krav om miljøsertifisering.
Dag Rune Olsen
Men krav om miljøsertifisering vil vera eit brot på regelverket for offentlege innkjøp, skriv Kjetil Østgård i eit svarinnlegg i Aftenposten torsdag. Han er leiar for Statens innkjøpssenter. Østgård skriv at staten no brukar innkjøpsmakta til å krevja at det vert mogleg å bestilla togbillettar, og at det er beklageleg at nokre ønskjer å stå utanfor den felles avtalen.
Vil ikkje forlenga
— Tok du litt hardt i, Olsen?
— Me har gjort ei anna vurdering enn Difi, og meiner at det er mogleg å stilla krav om miljøsertifisering. Me vurderer òg å stilla krav om klimanøytralitet. Dette er noko eg har diskutert med vår statsråd Iselin Nybø, seier Olsen.
Han seier at Bott-universiteta ikkje ønskjer å forlenga den reisebyråavtalen dei no har, men finna ei anna løysing når avtalen går ut. Moglegheita for å forlenga vil dei altså ikkje nytta seg av.
Olsen viser elles til at både kommunalminister Monica Mæland og næringsminister Torbjørn Røe Isaksen har uttalt seg om innovative innkjøp.
Billegast å ikkje reisa
Østgård skriv i innlegget at den rimelegaste og mest miljøvennlege reisa er den ein ikkje gjennomfører. Staten reiser for 2,4 milliardar kroner i året.
Dag Rune Olsen reiser mykje – mest i sektoren – og skal no føra rekneskap over eigne reiser. Målet er å redusera eigne CO₂-utslepp knytt til flyreiser med ti prosent samanlikna med i fjor.
Logg inn med en Google-konto, eller ved å opprette en Commento-konto gjennom å trykke på Login under. (Det kan være behov for å oppdatere siden når man logger inn første gang)
Vi modererer debatten i etterkant og alle innlegg må signeres med fullt navn. Se Khronos debattregler her. God debatt!