Blir nytt studentombod på Vestlandet

— Gjennom politikken har eg jobba mykje med studentar sine rettar, noko eg syns er kjempespennande. Då eg fekk denne sjansen, så måtte eg ta den, seier Brevik Møller til Khrono.

Brevik Møller er 28 år og kjem frå Raufoss i Vestre Toten.

Berre for to dagar sidan var ho ferdigutdanna jurist ved Universitetet i Bergen. Ho har vore aktiv både i Unge Venstre og i moderpartiet Venstre. Ho har hatt verv som internasjonal leiar i Unge Venstre sitt sentralstyre og ho har vore leiar og kommunestyrerepresentant i Vestre Toten Venstre.

Vil synleggjere studentombodsstillinga

No har ho tenkt å legge partipolitikken på hylla og gler seg til å ta til i den nye rolla som studentombod ved Høgskulen på Vestlandet (HVL).

— I denne stillinga kan eg kombinere jussen med mine andre interesser. Det er veldig spennande. Eg gler meg til å jobbe opp mot høgskuleliinga, til å fremje saker for styret, i tillegg til å vere ein god og trygg person for studentane i deira kvardag, seier Brevik Møller.

Ho gler seg til å bli meir kjend med verksemda til HVL.

— Eg vil arbeide for å synleggjere studentombodsstillinga og gjere det naturleg for studentane å kome til meg. Det er særleg viktig fordi HVL har fleire campusar og det er store avstandar, seier Brevik Møller.

Det nytilsette studentombodet på Høgskulen på Vestlandet byrjar i stillinga på nyåret. Ho tek over for Sindre Rødne Dueland, som no er studentombod ved Universitetet i Bergen.

• Les også: Studentane blir deporterte frå Marokko måndag ettermiddag