Fleire Nord-studentar i alvorleg ulykke — ein omkom

Det var klokka 05.30 søndag morgon at ein norskregistrert minibuss køyrte av Europaveg 10 ved Abisko i Kiruna i Sverige. Det skal ha vore glatt føre og minibussen hamna på taket. I bussen sat sju studentar som studerte ved campus Røstad ved Nord universitet, skriv avisa Fremover.

Seks av studentane er ifølgje avisa spanske statsborgarar, i alderen 25 - 30 år. Ein av dei involverte er norsk statsborgar. Ifølgje Expressen er den omkomne spansk. Dei sju skal ha vore på ei reise i privat regi, ifølgje kommunikasjonsleiar for Nord universitet, Tor Dybdahl Holthe, skriv Trønder-Avisa.

Vil ta vare på pårørande, studentar og tilsette

Nord universitet stadfesta måndag overfor Trønder-Avisa at det var ein av deira studentar som omkom i ulykka, og at resten også er studentar ved campus Røstad i Levanger.

To studentar blei måndag behandla på Universitetssjukehuset i Nord-Noreg i Tromsø, og fire blei behandla på sjukehuset i Narvik.

— Det er med stor sorg Nord universitet har motteke bodskapen om at ein av våre studentar har omkome. Vi ønskjer å uttrykke vår djupaste medfølelse med dei pårørande. Vår viktigaste oppgåve no er å ta vare på både pårørande, dei andre studentane som var med i ulykka, øvrige studentar og tilsette, seier rektor Hanne Solheim Hansen i ein e-post til avisa.

Måndag var det ei samling for studentar som hadde behov for å møtast på campus Røstad.