NHH tek ikkje imot innreisande utvekslingsstudentar

Noregs handelshøgskule (NHH) avlyser all utveksling for innreisande studentar hausten 2020, både på bachelor- og masternivå, opplyser dei på eigne heimesider.

Det skjer etter at høgskulen tidlegare denne månaden bestemte at utveksling for utreisande studentar på masternivå heller ikkje blir noko av den komande hausten, skriv K7 Bulletin.

Det vil heller ikkje bli sett opp noko virtuelt alternativ for innreisande studentar.

— Vi er klar over at nokre innreisande studentar ikkje vil ha høve til å utsetja planlagde opphald, og at dei truleg vil bli skuffa. Diverre kan vi ikkje tilby eit virtuelt utvekslingssemester ved NHH som eit alternativ, skriv høgskulen på heimesidene.

Dei presiserer på heimesidene at avgjerda kun gjeld utveksling og ikkje for dobbeltgrad-studentar. Studentane dette gjeld har fått informasjon direkte, opplyser pressekontakt Sigrid Folkestad til K7 Bulletin.

Høgskulen har eit mål om å kunne ta imot innreisande utvekslingsstudentar våren 2021.

(Ragnhild Vartdal / Khrono)