I retten

Beit, lugga og slo med­studentar. Her er dommen

Den unge kvinna erkjente ikkje straffskuld etter at festen gjekk ut av kontroll.

Advokat Ole Marius Leirvåg forsvarte den 23 år gamle studenten i Romsdal tingrett i førre veke.
Publisert Oppdatert

OBS! Denne artikkelen er mer enn tre år gammel, og kan inneholde utdatert informasjon.

Ein 23 år gammal student ved Høgskulen i Molde er i Romsdal tingrett dømt til 90 dagar i fengsel for vald mot medstudentar.

Den unge kvinna er også dømt til å betale skadeerstatning og oppreisning på over 13 000 kroner til ein av medstudentane.

Den tiltalte 23-åringen møtte fleire medstudentar i retten torsdag i førre veke. Ho erkjente ikkje straffskuld. Det skriv Panorama.

— Min klient er usamd i retten si bevisvurdering. Vi vil saman gå gjennom dommen nøye for å vurdere eventuell anke, skriv 23-åringen sin forsvarar, Ole Marius Leirvåg i ein SMS til Khrono.

— Det var mobbing. Dei lo av meg.

Det var på den siste festdagen under faddeveka i fjor at studentane barka saman.

Den tiltalte 23-åringen skal ha dansa framfor andre medstudentar som sat ved nokre bord utanfor studentbustadane på campus i Molde. Så skal ein av studentane ha byrja å flire av seansen, ifølgje tiltalte.

Det skulle få dramatiske konsekvensar.

Ein av dei fornærma skal deretter ha prøvd å blande seg inn i situasjonen. Tiltalte meiner ho prøvde å helle væske frå ei flaske på hovudet til den fornærma som braut inn.

Fornærma seier på si side at ho også vart slått i hovudet med flaska og at det heile utvikla seg til eit basketak der ho også vart lugga i håret av den tiltalte 23-åringen.

Den fornærma 20-åringen sa i retten at mykje hår hadde blitt rive av og at ho hadde fått ein kul i hovudet som følgje av flaskeslaget.

Den tiltalte meiner på si side at lugginga kom som eit resultat av at den fornærma skal ha slått og lagt ho i bakken.

— Eg ville ikkje ha konflikt. Eg vart sint når ho slo meg i ansiktet mange gonger. Det var mobbing. Dei lo av meg. Dei kunne ha sagt unnskyld, sa 23-åringen i retten ifølgje Panorama.

Ifølgje hennar forklaring, så følte ho sjølv at ho skulle døy under basketaket, og at ho gjorde alt saman for å kjempe for livet.

23-åringen sa også at ho skal ha informert faddergruppa si om at ho sleit med depresjon og kunne vere ustabil.

Beit ein annan i leggen

Men basketaket enda ikkje der.

Medan den eine fornærma og den tiltalte låg på bakken, skal tiltalte også ha bitt ein av faddrane i leggen.

— Det var eit alvorleg bitt, sa den 21 år gamle fadderen i retten torsdag.

Fadderen sa likevel at han hadde sympati for tiltalte og at ho etter hans meining hadde blitt mobba.

La ned påstand om 90 dagar i fengsel

I rettssaka spelte aktor, politiadvokat Janne Woie, fleire videosnuttar som viste delar av valdshandlingane, filma av medstudentar på staden.

I si avsluttande prosedyre la Woie vekt på at tiltalte erkjente mykje av det som stod i tiltalen, blant anna biting og lugging. Vidare meinte Woie at videosnuttane også var bevis på at 23-åringen slo den eine fornærma i saka med flaske.

«Lett krenkbar, hadde problemer med sinnemeistring og ho var full» sa politiadvokaten om 23-åringen i si prosedyre, før ho la ned påstand om 90 dagar i fengsel utan vilkår.

23-åringen sin forsvarar, Ole Marius Leirvåg, meinte på si side at den tiltalte måtte frifinnast, subsidiært at retten burde vurdere samfunnsstraff.

Powered by Labrador CMS