Akademia hjarteleg tilstades i Arendal

(Sjå lenker til fullstendig program og oversikt over arrangørar nedst i saka).

12.-17. august går nok ein gong Arendalsuka av stabelen – der «aktører innenfor politikk, samfunns- og næringsliv møter hverandre og folk, for debatt og utforming av politikk for nåtid og framtid», som arrangøren sjølv formulerer dmmet. For dei eldste – NTNU, Universitetet i Oslo (UiO) og Universitetet i Bergen (UiB) – er arrangementet blitt ein fast post. Dei stiller alle med skip til kai i Pollen og omfattande program i tett samarbeid med aktørar frå næringslivet og andre sektorar.

Samla er det over 1200 arrangement i løpet av veka, av desse er grovt rekna rundt 200 med arrangørar frå høgare utdanning og forsking og organisasjonar tilknytta akademia. I fjor var det rundt 100.

Torsdagen er spesielt tettpakka med arrangement for og med universitets- og høgskulesektoren

— Effektiv møteplass

For Universitetet i Stavanger (UiS) er det første gong med eige program i Arendal. Dei sender ti medarbeidarar til Arendal.

— Vi ser på det som ein effektiv måte å møte samarbeidspartnarar på og for å ta del i det offentlege ordskiftet, seier kommunikasjonsrådgivar ved UiS, Vibecke Lykke Olsen.

Programmet til UiS spenner frå forsking på leik og læring i barnhage til kunstig intelligens i medisinen. I tillegg er hardangerjekta «Caroline» av Sandnes leigd inn som «smartskute» heile veka som base for presentasjon av smart innovasjon og smarte byar.

15 000 kroner må siddisane ut med for å leige båten. Totalt går det vel 70 000 kroner til møtelokale og bevertning i Arendal. I tillegg kjem reise og opphald for eit titals medarbeidarar.

Storebror i Oslo si satsing er omtrent ti gongar større.

Stølen: Ikkje pleie nettverk

UiO sender rundt hundre medarbeidarar til Arendal, i hovudsak forskarar. I år som i fjor har universitetet leigd veteranskipet MS «Sunnhordland» av Bergen. For dei 532 000 kronene det kostar får UiO både scener for arrangement og overnatting for sine.

Rektor Svein Stølen seier han ikkje kjem til å få kapteinslugaren, strukturen er flat.

— Det er såpass trongt på lugaren at du må gå ut for å tenke, seier han, men er ikkje mindre entusiastisk av den grunn.

— Vår strategi er å sleppe fagfolka til. Det skal vere kunnskap rett frå kjelda, ikkje leiinga som skal vere i sentrum, seier Stølen. Han seier han ikkje er i Arendal for å pleie nettverk og drive lobby, ei sentral oppgåve for svært mange tilreisande til Arendalsuka, som også er kjent som årets viktigaste veke for PR-bransjen.

I tillegg til leige av skip kjem reise og opphald for dei rundt hundre på sluttrekninga til universitetet, som dermed må plusse på nokre hundre tusen for å få dei 26 arrangementa i hamn, med tema frå klima og berekraft til einsemd og tannhelse.

Topptungt NTNU

NTNU, Noregs største universitet, vil ha langt færre på Arendalsuka enn oslofolket – og fleirtalet er ikkje forskarar. På reiselista står mellom anna heile rektoratet, tre dekanar og fleire frå kommunikasjonsavdelinga. Totalt reiser 25 personar, dei fleste blir i ei til to netter.

Også NTNU har funne ut at skip er fungerer i den overfylte sørlandsbyen dagane i august, og har same skip til kai som i fjor. MS «Sandnes» er leigd inn for 300 000 kroner, og veteranskipet er både base for arrangement og hotell for trøndarane (også her kjem reiseutgifter i tillegg).

Universitetet i Bergen opplyser at dei kjem til å satse omtrent på same nivå som i 2018. Då budsjetterte UiB med ca. 300 000 kroner, utanom leige av stand, møtelokale, reise- og overnattingsutgifter.

I år skal omlag 30 til Arendal, nokon av desse er eksterne som blir henta inn til UiB-arrangement.

«Statsraad Lemkuhl» kjem til å ligge til kai i Pollen og huse arrangementa. Leige av skipet er gjort i spleiselag med fleire andre aktørar, blant dei energikonsernet BKK. BKK er den nylege avgåtte UiB-lobbyisten Rune Indrøys nye arbeidsgivar.

UiB trappa opp satsinga på Arendalsuka 2018, då budsjettet vart om lag sjudobla i forhold til året før. I fjor reiste 38 medarbeidarar og utgiftene enda på 700 000, av dette 160 000 i reiseutgifter. Dei kjem til å gå noko ned i år.

Les også fra 2017:

Stappfullt på nach hos studentene

Rektor i riggen

For nytt av året er at Statsraaden skal seglast frå Bergen til Arendal med rundt 80 passasjerar, blant dei cirka 20 frå universitetet, eit par politikarar og resten frå næringslivet. Det blir fagleg program om bord med tema vind, vatn og klima i regi av Bjerknessenteret for klimaforskning. I tillegg blir det eit ikkje heilt ubetydeleg element av teambuilding. Alle skal vere mannskap på den tre dagars seilasen.

Rektor Dag Rune Olsen seier han er klar for hundevakta. Og for å klatre i riggen.

— Med slips, om nødvendig.

Her er nokre av dei som sender folk og har program

(I lenkene finn du søkefeltet i programmet. Skriv inn namnet på institusjonen så kjem alle arrangement opp. Programmet blir oppdatert kontinuerlig.)

Les også:

Har du vært avlogget i sommer? Her er noen saker du gikk glipp av.

• NTNU. Sender 25 medarbeidarar. I programmet er dei førde opp med 25 arrangement.
• NMBU. Har totalt ti medarbeidarar på Arendalsuka. Samarbeider om å halde to arrangement.
• Universitetet i Bergen. Sender ca. 30 medarbeidarar. Sju eigne arrangement i Arendal, i tillegg til fleire under seilas frå Bergen med «Statsraad Lemkuhl».
• Universitetet i Oslo. Sender cirka 100 medarbeidarar. 26 eigne arrangement i tillegg til forskingstokt.
• Universitetet i Stavanger. Sender ti medarbeidarar. Er arrangør og/eller medarrangør på sju arrangement.
• UiT Norges arktiske universitet. Sender truleg sju medarbeidarar. Er medarrangør og/eller deltakar på sju arrangement.
• Universitetet i Agder. Ukjent tal på deltakarar, men mange er med sidan universitetet er lokalisert i landsdelen. Står for rundt 26 eigne arrangment, og medvirker i 37.
• OsloMet. Sender ca. 20 medarbeidarar. Ingen eigne arrangement. Rektor og prorektor deltar på arrangement, i tillegg til en god del fleire tilsette.
• Universitetet i Sørøst-Norge. Sender truleg 13 medarbeidarar. Har fire eigne arrangement.
• Høgskulen på Vestlandet. Sender 12 medarbeidarar. Held to arrangement.
• Norges idrettshøgskole. På Arendalsuka for første gong. Rektor, prorektor, direktør og kommunisjonssjef. Ingen eigne arrangement.
• Høgskolen i Molde. Rektor reiser. Er ikkje med som institusjon. Ingen arrangement. Professor Turid Aarseth deltek i eit arrangement.
• Norges handelshøyskole (NHH). Sender fem til seks deltakarar til seks eller sju arrangement.
• Høyskolen Kristiania. Har ingen eigne arrangement, men medvirker i 13.
• Nord universitet står oppført med to arrangement i programmet
• Høgskolen i Østfold er representert på to arrangementer ved forsker Frode Hübertz Haaland.
• Høgskulen i Volda, professor Tor Johan Ekeland deltar ifølgje programmet
• BI står oppført med 8 arrangement
• Akademikerne er tilstades med fire arrangement
• Unio har fire arrangement
• Norsk studentorganisasjon deltek - og eit høgdepunkt brukar å vere Studentnach
• Her finn du oversikt over alle arrangørar

(Tips oss gjerne dersom fleire arrangement bør vere med i oversikten).